.

Takipsilim

Alam kong marami ka pang bagay na hindi naiintindihan

Ako naman, komplikado't maraming dinadahilan

Nakagawian ko nang igawan at bigyan ka ng tula

Tinagalog ko lamang ngayon para maiba naman.

Wala akong ibang hinihingi mula sa iyo

Kung hindi ang basahin mo lamang ito

Marinig mula sa iyo ang totoo

Baka maaari kasing maalis na itong nararamdaman ko.

Alam mo naman ang nararamdaman ko, hindi ba?

O malabo pa rin ba sa'yo o sa iyo'y balewala lang talaga?

Sasabihin ko na lang ulit sa'yo sakaling nakalimutan mo

Ikaw pa lang ang nakapagpasaya sa'kin ng sobra sa buong buhay ko.

Malamang alam mo na rin kung gaano ako kaselosa

Lalo na kapag pinapakita mong wala na lang ako kung hindi itsapwera

'Di ko naman pwedeng pakialamanan kung anong gusto mo

Kaya lagi, umiiwas na lamang ako.

Ayokong makita mong mahina ako

Lalo na kapag nasasaktan mo ako

Kaya ako na lang ang lumalayo't nagtatago

Umiiyak mag-isa sa walang katuturang nararamdaman ko.

Nasasaktan na talaga ako't hindi ko maintindihan

Kung ikaw ba ang may ayaw na sa'kin anumang dahilan

Hindi ko na maalala kung sino ang unang lumayo

Kung sino ang nagsimula ng lahat... ikaw ba o ako?

Pasko na at nalulungkot ako

Dahil hindi ako ang ngayo'y kasama't nasa tabi mo

Pero kung maghanap ng bago ang desisyon mo

Sabihin mo nang deretso sa'kin at tatanggapin ko.

'Di ko na kayang tumingin ng deretso sa mga mata mo

'Di na gaya nang dati, masakit din kasi 'pag ginawa ko.

'Di ko rin alam kung anong nasa isip mo

Kung huling tula na ba itong gagawin ko para sa'yo.

Kung wala na talaga o ayaw mo na

Itapon mo na lamang itong tulang ito sa dagat, sa harap ko.

Kung yun na ang talagang desisyon mo

Siguro mahihirapan ako pero ito'y iintindihin ko.

Kung kaya ko lang burahin lahat ng memoryang ito

Na akala ko ay maitatago ko't mapapanatiling kasiyahan ko

Ngunit sadyang mali nga lamang ba ako

Dahil habang tumatagal, lumalalim lalo ang sugat na naiwan dito sa puso ko.

Habang sinusulat ko ito, naalala kong ikaw ay bata lamang

Marami pang hindi alam at hindi naiintindihan

Pakiramdam ko tuloy walang kabuluhan ito

At hindi mo pa kayang intindihin ito gaya ng gusto ko.

Sana malaman ko kung tapos na nga ba tayo

Kung galit ka o ikaw ay nalilito

Tinapon ko na ang pride ko para isulat at umamin sa'yo

Kaya sana sabihin mo sa'kin kung ano ang nasa isip mo.